LAOAG CITY – Kinumpirmaran ti Department of Information and Communications Technology a kabaelan a lusutan dagiti scammers ti maipatpatungpal a Subscriber Identity/Identification Module (SIM) registration iti panangluko da iti tattao.
Segun ken ni Department of Information and Communications Technology Secretary Ivan John Uy, dagiti scam iti agdama ket masansan a makita kadagiti illegitimate a text messages.
Inlawlawag na nga adda ti device nga us-usaren dagiti scammers tapno makaderetso iti cell sites dagiti telecommunications.
Gapu iti daytoy, saanen a kasapulan nga agusar ti sim card iti panang-scam da iti publiko.
Innayon ni Secretary Ivan John Uy a dagiti scammers ket masansan nga agpampammarang kas account dagiti bangko ken uray iti ahensiya ti gobyerno tapno laeng magundawayan da ti pada da a tao.
Mainaig iti daytoy, nagpalagip manen ti sekretaryo a saan nga i-click ti aniaman a link a karaman dagiti maaw-awat a text messages.
