LAOAG CITY – Naarestar ti maysa a Security Guard ti Bangui National High School babaen iti Anti-Illegal Drug Buy-bust Operation iti Brgy. Abaca iti ili ti Bangui.
Basar iti Bangui Municipal Police Station, ti suspek ket agtawen iti 45, naasawaan ken residente ti Brgy. San Lorenzo iti nasao nga ili.
Natiliw ti suspek kalpasan a maipagarup a naglako daytoy ti maysa nga heat sealed transparent plastic sachet a naglaon ti maatap a shabu iti maysa a pulis a nagpammarang kas poseur-buyer.
Malaksid iti daytoy, nakumpiskar pay manipud iti suspek ti dua nga heat sealed transparent plastic sachet ken maysa a ribu a pisos a mapapati a nausar kas buy-bust money.
Kabayatanna, manamnama a sumango ti suspek iti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
