LAOAG CITY – Inpetteng manen ni Senador Bong Go, Vice Chairman ti Senate Committee on Health, ti pananglaban kontra iti maaw-awagan nga “white elephant projects” wenno dagiti proyekto a nakatiwangwang ken saan a pakairanranudan.
Segun kenkuana, dakkel a pannakasayang ti kwarta a nagrigatan dagiti umili no agtungpal laeng kadagiti awan serbina a proyekto a pinondoan ti gobierno.
Kagiddan ti inagurasyon ti baro a Super Health Center iti Maco, Davao de Oro, pinalagipan ni Go dagiti national government agencies ken local government units a siguradwen nga operational ken pakairanudan dagiti proyekto a ponpondoan usar ti kwarta ti umili.
Mainaig iti daytoy, nagpanawagan manen ti senado nga iprayoridad dagiti proyekto a direkta a pakairanudan dagiti agkasapulan, kas ti panagipatakder ti Super Health Centers iti nasusulimek a lugar.
Inpalagip na a saan nga ipalubos nga agbalin nga “white elephant” dagitoy ken masigurado nga agtultuloy ti serbisyo iti publiko.
Innayon ni Go a masapol nga unaen ti gobierno a pagserbian dagiti marigrigat imbes a ti narugit a panagpulpulitika.
Inpaganetget na a ti pudno a gagem dagiti proyekto ket ti mangipaay ti namnama ken tulong kadagiti Pilipino, aglalo iti panawen ti panagkasapulan.
