LAOAG CITY – Inpetteng ni Senador Christopher “Bong” Go nga awan ti linabsing na a linteg ken ipaima na lattan iti Diyos ti amin.
Inaramid daytoy ni Go kalpasan dagiti report a maipagarop a nangiparuk-at ti International Criminal Court ti warrant of arrest kontra kenkuana.
Segun ken ni Go, kaanuman ket saan nagbalin a paset ti mandato na dagiti police issue ken mangnamnama saan a mapulitika ti isyu.
Rimuar ti isyu kalpasan nga inrakurak ni Davao City First District Representative Paolo “Pulong” Duterte nga adda ti impormasyon na a maipagarop a nangiparuk-aten ti International Criminal Court ti arrest warrant kontra ken ni Go ken dua a dati nga opisyal ti pulisya.
Nupay kasta, inpetteng ti Department of the Interior and Local Government nga awan pay ti naawat da a pormal nga abiso maipanggep iti daytoy.
Ni Go ken ni Senador Ronald Dela Rosa ket karaman kadagiti opisyal nga innaganan ti International Criminal Court a maipagarop a karaman kadagiti adda ti pagsungsungbatan na kadagiti crimes against humaity mainaig iti war on drugs ni dati a Presidente Rodrigo Duterte.
Kabayatanna, naglikudan manen ni Go dagiti alegasyon ken inbatad na nga awan ti aniaman a pakainaigan na wenno otoridad na kadagiti akusasyon a maibatbato kenkuana.
