LAOAG CITY – Nagballaag ni Senador Loren Legarda a saan nga usto ti plano a panagangkat ti Department of Agriculture iti 300,000-350,000 a metriko tonelada ti ikan kabayatan a nangina pay laeng ti presio ti krudo.
Daytoy ket gapu ta ad-adda laeng a mangparigat kadagiti mangngalap, no sadinno nga inpaganetget ti senadora a nasken nga ipangpangruna ti gobierno ti direkta a suporta babaen iti VAT suspension iti krudo.
Segun ken ni Legarda, saan a mabalin nga isukat dagiti mangngalap iti imported nga ikan.
Inbatad ti senadora a ti kasapulan dagiti mangngalap ket tulong, suporta iti pagbiaganda, ken pakalag-anan da iti presio ti krudo gapu ta patien na a no awan dagiti mangngalap, awan met ti kanen dagiti pamilia a Pilipino.
Umab-abot iti 80 percent iti gastos dagiti mangngalap iti krudo, isut gapuna nga ado dagiti nagsardeng paylaeng nga agkalap.
