LAOAG CITY – Saan pay laeng nga agikeddeng ni Senate Minority Leader Koko Pimentel ti panagdengngeg iti Senado maipanggep iti war on drugs ti Duterte administration.
Inbatad ni Pimentel, mangisayangkat laeng ti panagdengngeg iti kanito a maikkanen ti contempt powers ti Senate Blue Ribbon Subcommittee.
Inlawlawagna nga awan ti bileg iti agdama ti subcommittee nga agisyu ti subpoena ken arrest order kadagiti agkedked a resource person nga agatendar iti hearing.
Kunana pay ti Minority Leader, agimbitarda laeng ti resource person nga addaan ti personal knowledge maipanggep iti war on drugs campaign ni dati a Presidente Rodrigo Duterte.
Mainaig iti daytoy, kalpasan a nagatendar ni dati a Senador Antonio Trillanes iti Quad Committee Hearing ti Kamara, nasaludsod pay ni Pimentel no imbitarenda ni Trillanes iti Senado.
Kunana a nasaysayaat nga agisubmitir nga umuna ti dati a Senador ti maysa nga affidavit a mangidetalye ti agbalin a testimoniana.
Kabayatanna, “looking forward” met ni Senadora Risa Hontiveros a makaatendar ni Trillanes iti panagdengngeg ti Senado maipanggep iti war on drugs.
Immuna iti daytoy, idi Oktubre 28, nagsinnungbat da Hontiveros ken Duterte.
Binabalaw ni Hontiveros ti dati a Presidente a saan nga agsao ti dakes kabayatan ti kaaddana iti pormal a panagdengngeg.
Naammoan a ti imbestigasion ti Blue Ribbon ti Senado ti umuna a congressional hearing maipanggep iti nadara a war on drugs iti babaen ti Duterte administration.
