LAOAG CITY – Nakasagana ni Senator-Judge Alan Peter Cayetano a mangsango ti manamnama nga imbestigasyon ti National Bureau of Investigation (NBI) mainaig kadagiti maipagarop nga iregularidad iti 2019 Southeast Asian (SEA) Games a naisayangkat iti Pilipinas.
Iti panagdengngeg idi Hulyo 15, inbatad ni Cayetano nga awan ti pagbutngan na kadagiti alegasyon a maibatbato kontra kenkuana.
Inpetteng na a no adda ti anomalya ket isuna ti umuna nga agpungtot.
Maipalagip nga im-imbestigaren ti NBI dagiti maipagarop nga iregularidad iti panangusar ti pondo para iti maysa nga sports complex iti New Clark City, Tarlac nga inusar dagiti atleta idi 2019 SEA Games.
Segun ken ni NBI Director Melvin Matibag, adda ti impormasyon a naawat da nga adda ti binilyon a pondo nga adda ti pakainaigan iti proyekto a maipagarop a saan pay a na-liquidate.
Rimuar pay ti alegasyon a maysa a pribado a kumpanya ti nakaawat ti mapatta-patta a P10 billion a bayad nga awan ti naisayangkat a bidding, iti babaen ti maipagarop a congressional insertions.
