LAOAG CITY – Nakasagana ni Senador Bong Go a tumulong kadagiti biktima ti Bagyo Ineng kangrunaan dagiti ili ken ciudad ditoy probinsia kas Piddig, San Nicolas, Pasuquin, Paoay ken ditoy ciudad ti Laoag a nakaro a naapektaran gubuay ti bagyo Ineng.
Inbatad na a gapu ta tallo nga aldaw nga awan ti serrek da iti Senado ket agsursursor isuna iti pagilyan kas ditoy Ilocos Norte a naideklara ti State of Calamity.
Segun iti Senador, agtultuloy nga agbalin a wagas isuna iti liderato ni Presidente Rodrigo Duterte tapno dagus a masolusyonan dagiti problema dagiti umili.
Inpakaammo na nga adda ti 11,200 a bags ti bagas ti inpaay ti Japan iti National Food Authority ken ited naiti biang ti Department of Social Welfare and Development wenno DSWD nga isudanto ti mangibunong kadagiti biktima ti Bagyo.
Kabayatanna, inpadanon met ni Go ti pannakipagladingit ni Presidente Duterte kadagiti pamilya dagiti pimmusay gapu iti iduduprak ti Bagyo Ineng.
Kabayatanna, dimmawat ti dispensar ti senador gapu ta saan nga agbayag isuna ditoy probinsya gapu ti adu a trabaho na idiay Metro Manila.
Nupay kasta, silulukat ti opisina na idiay Senado iti aniaman a kiddaw dagiti Ilokano.
