LAOAG CITY – Nagpanawagan da Mamamayang Liberal Party-list Rep. Leila de Lima ken Akbayan Rep. Percy Cendaña para iti panangiwayat ti independent investigation mainaig iti panangiggem ti Senado iti situasion ni Sen. Ronald “Bato” dela Rosa.
Kangrunaan a paim-imbestigaran da De Lima ken Cendaña ti panangikabil ken ni Dela Rosa iti protective custody ti Senado, kellaat a panaglibas ken ti nagbalin a riribok iti pasdek ti Senado idi Mayo 13 no sadinno nga adda ti nagsasaruno a putok ti paltog ti nangngegan.
Malidayan da De Lima ken Cendaña a kinaluban ti Senado ni Dela Rosa iti baet a panagbalin a wanted daytoy iti International Criminal Court (ICC) gapu iti kaso a crimes against humanity a napasamak iti babaen ti inpatungpal a war on drugs ti Duterte administration.
Kuna ni De Lima, saan a mabalin nga internal wenno saan a mabalin a ti Senado mismo ti agimbestigar.
Inpetteng ni Rep. Cendaña, nakababain ti Senado gapu ta nadadaelen ti kredebilidad daytoy kalpasan a nagpadiktar kadagiti kampo ni Duterte ti panangipaay ti proteksion iti maysa a pugante.
