LAOAG CITY – Kampante ni Senate Committee on Foreign Relations Chairperson, Sen. Imee Marcos iti kinatalged ti baro a majority bloc ti Senado.
Iti maysa nga interview, nasaludsud iti presidential sister maipanggep iti estado ti mayorya, nasurok a maysa a lawas sipud nabukel daytoy.
Segun iti senadora, nagtalinaed a natalged ken solido ti 13 a miyembro ti majority.
Daytoy ket uray masansan a maipagarop a makurkuriro dagiti miembro ti nasao a bloc.
Nasaludsud pay iti senadora no possible nga adda ti agtraydor kadagiti miyembro ti mayorya, ngem kinontra daytoy ti presidential sister.
Maipalagip a Mayo 13 idi nabukel ti baro a Senate majority bloc a nagbalin a rangtay tapno naan-anay a maelektaran kas Senate President ni Sen. Allan Peter Cayetano.
Bukbuklen ti baro a senate majority bloc ti 13 a senador a pakairamanan ni Sen. Ronald Dela Rosa a dagus metlaeng a nagpukaw kalpasan ti naimballigian a panagsukat ti liderato iti senado.
