LAOAG CITY – Kinondenar ni Senador Imee Marcos ti dua nga aldaw iti maysa a lawas a serrek laeng dagiti empleado ti Department of Energy (DOE) iti baet ti krisis iti enerhiya a sangsangwen ti pagilian.
Inpetteng ni Marcos a ti DOE ti kangrunaan a kasapulan nga ahensya ita a krisis ngem arigna agbakbakasyon dagiti empleado ti ahensya gapu ta dua nga aldaw da laeng a sumrek iti trabaho.
Kuna pay ni Marcos nga ado dagiti agrekreklamo nga agturturong iti opisina ti Department of Energy nga agpapirma ti napapateg a dokumento ngem awan ti tao.
Inkalintegan met ni Energy Sec. Sharon Garin, a nupay naka 2-days onsite work week ti ahensya ket saan da met nga agsarsardeng iti panagtrabaho da.
Innayon na nga ad-adda pay a nagbalin da nga aktibo iti agdama dagiti empleado ti Department of Energy iti baet ti hybrid a set up, ken inpasigurado na a maan-annong da amin ti trabaho da.
