LAOAG CITY – Nadismaya ni Senador Imee Marcos iti kinabayag ti pannakaisubli ti suplay ti kuryente ditoy Ilocos Norte kalpasan iti iduduprak ti bagyo Egay.
Iti interview ken ni Senador Marcos iti ibibisita na ditoy probinsya, inbatad na a ti immuna a naimandar kalpasan ti iduduprak ti bagyo Egay ket ti pannakaisubli ti suplay ti kuryente.
Nupay kasta, inpetteng na a basar iti obserbasyon na ket nakabaybayag ti aksyon ti Ilocos Norte Electric Cooperative (INEC).
Inpalgak na nga ado dagiti inikkat ti management ti Ilocos Norte Electric Cooperative ngem saan da a nangala ken nangsanay ti kasukat da isut gapuna nga agkurkurang ti linemen ti kooperatiba.
Inpaganetget ti senador nga ado dagiti equipments ti nasao a kooperatiba ngem awan ti tao a mangusar.
Gapo iti daytoy, inpakaammo ni Senador Marcos a kinasarita da iti Department of Public Works and Highways a tumulong ngem awan met ti ammo dagiti maseknan maipanggep iti kuryente.
Inpaganetget ni Marcos a gapu iti nasao a pasamak ket nagkiddaw ti tulong manipod iti kabangibang a probinsiya kas iti Tarlac ken Pangasinan babaen ti tulong iti National Electrification Administration.
Inpetteng na a nakababain ti agkiddaw ti tulong kadagiti kaparanget a probinsya gapo ta ado ti windmill ken solar ditoy Ilocos Norte ngem isu ti napanunot na a kapintasan a maaramid tapno alisto ti panakaisubli ti suplay ti kuryente ditoy probinsiya.
Kabayatanna, iti impormasyon manipod iti Ilocos Norte Electric Cooperative agingga iti oras ti alas-11 idi rabii ket 127 a barangays wenno 22.72% paylaeng ti naisubli ti suplay ti kuryente na.
