LAOAG CITY – Nangiparuk-at ti show-cause orders ti Senate impeachment court kontra iti sumagmamano a miyembro ti House prosecution panel gapu iti possible a panaglabsing iti sub judice rule.
Daytoy ti inrakurak ni Presiding Officer Chiz Escudero sakbay a nagleppas ti maika-25 nga impeachment trial kontra ken ni Vice President Sara Duterte.
Nabilin ti clerk of court nga iserbi dagiti order kalpasan ti trial idi kalman, Setyembre 16.
Maipalagip nga idi Agosto 26 ket nangikeddeng ni Escudeo ti nalawag a guidelines iti sub judice rule.
Ipawil ti pagannurutan ti agpada a prosecution ken defense teams, dagiti testigo da, ti respondent, ken dagiti senator-judge a mangipaay ti pampubliko a komento maipanggep iti merito ti nakapenpen a kaso.
Maibasar iti ruling, dagiti manglabsing ti sub judice rule ket sumango iti public reprimand nga addaan ti admonition iti umuna a panaglabsing.
Mabalin a mapatawan ti multa a P30,000, nga addaan ti posibilidad a mapawilan nga agsarita, mangkontra wenno agsaludsud kadagiti testigo iti plenaryo, kadagiti sumaruno a panaglabsing.
Iti agdama, saan pay nga innaganan ni Escudero no siasinno dagiti maibagbag a naglabsing iti sub judice rule.
