LAOAG CITY – Naiplastar ti sentralisado a lugar para iti Business Permit and Licensing Office ken City Treasurer’s Office iti Laoag City Multipurpose Hall.
Daytoy ket tapno masigurado ti alisto a proseso iti panagi-renew ti business permit ken panagbayad ti amilyar.
Segun ken ni Mayor James Bryan Alcid, paset daytoy ti tarigagay a mapalag-an, mapaalisto ken masigurado a naurnos dagiti kasapulan a dokumento dagiti umili nangnangruna kadagiti addaan ti babassit a negosio tapno maaddaanda ti ad-adu pay nga oras a mangpaadu ken mangpadakkel ti negosioda.
Mainaig iti daytoy, inpakaammo ni Atty. Charito Malicad, mangidadaulo ti Business Permit and Licensing Office nga agarup maysa a ribu pay laeng dagiti naka-renew ti business permit-na.
Inbatadna a babaen iti pannakaiyalud-odna ket mangnamnamada a manayonan pay ti nasao a bilang.
Inlawlawagna a no dagiti saanton a makakamat sakbay iti naikeddeng a deadline-na daytoy ket addanton ti maipataw a multa.
Ginutigotna dagiti saan pay a nakapag-renew ti business permit-na a gundawayan ti naipaay nga extension tapno awan ti agbalin a problema dagitoy.
