LAOAG CITY – Nagballaag ti Department of Health iti publiko kontra iti agwarwaras iti online a makatulong ti siling labuyo tapno makaagas iti dengue.
Basar iti nasao nga ahensia, awan ti agas kontra iti dengue no di ket liklikan laeng ti kagat ti lamok nga addaan ti dengue virus.
Kagiddan iti daytoy, insingasing ti Department of Health ti panagsuot ti bado nga addaan ti atiddog a manggas ken pantalon, panagaplikar ti mosquito repellant lotion ken spray iti kudil tapno maliklikan iti kagat ti lamok nga isu ti mangitunda ti dengue.
Inabisoan ti Department of Health ti asinoman a dagus nga agpakonsultar iti doktor no makarikna kadagiti sintomas ti dengue kas ti gurigor, panagsakit ti ulo, panagsakit ti buksit, panag-vomit ken panaglamma.
Ginutigotna ti publiko a mangala kadagiti impormasion kadagiti lehitimo a source kas kadagiti opisial nga online site ti nasao nga ahensia.
