LAOAG CITY – Mapaayaban iti sumaruno a panagdengngeg ti Senate Blue Ribbon Committee ni dati a Congressman Zaldy Co mainaig iti maipagarup a pannakairaman daytoy iti maanomalya kadagiti flood control projects.
Daytoy ket kalpasan ti kumpirmasion ni Presidente Ferdinand Marcos Jr. a naarestar ni Co iti Czech Republic.
Inbatad ni Sen. Ping Lacson, Chairman ti komite, insigida a mapatulodan ti imbitasion wenno summons ni Co iti umuna a gundaway a mabalin daytoy a sumango.
Nupay kasta, inlawlawag ni Lacson a dumalan pay daytoy iti legal a proseso gapu ta adda ti nakapenpen a kaso ken warrant of arrest manipud iti Sandiganbayan kontra iti dati nga agpanpanday linteg.
Maipalagip a naisyuan ti show cause order ni Co idi Enero kalpasan a saan daytoy a nagatendar kadagiti immuna a panagdengngeg iti baet kadagiti naipadamag nga imbitasion ken subpoena.
Iti agdama, manarimaan ti panangkumpleto ti komite dagiti pirma para iti partial committee report a mangirekrekomendar nga imbestigaran ni Co ken dadduma pay a karaman iti maipagarup a panangabuso iti pundo para iti flood control projects.
