LAOAG CITY – Kinumpirmaran ni Brgy. Chairman Alwin Pillos ti Brgy. Valdez iti ili ti Marcos a naipatungpal ti lockdown iti sibubukel a Sitio Simeon iti nasao a Barangay kalpasan a nagbalin a primary contact ti maysa a residente nga agpapaay kas maysa nga STL Collector.
Ti nasao a residente ket primary contact iti nagpositibo iti COVID-19 a maysa met laeng nga STL Collector ti Brgy. Cali iti ili ti Dingras.
Gapu iti daytoy, kunana a dagus na nga inyimplementar ti pannakaipatungpal ti lockdown ti Sitio Simeon tapno maliklikan ti posible a panagwaras pay ti virus iti barangay da.
Babaen iti daytoy, inbatad na a malappedan ken makontrol ti garaw dagiti tattao iti panagruar da kadagiti pagtaenga nda.
Inbatad na a dimmalan ti swab test ti kabarangaya nda idi Abril 24 tapno maamoan no daytoy ket naakaran ti virus wenno saan ken iti agdama ket maiyur-uray pay laeng ti resulta na.
Inlawlawag na nga umabot ti 24 a pamilya ti naapektaran ti pannakaipatungpal ti lockdown iti Sitio Simeon no sadino nasurok 50 nga indibidual dagiti residente nga agnanaed iti nasao a lugar.
Inpasigurado met ti Kapitan a saan a nagturong ti maseknan a residente iti sabali pay a Sitio ti Barangay da rason a saan a kasapulan a mairamraman dagitoy iti pannakaiyimplementar ti lockdown.
