LAOAG CITY – Ilunglungalong ni Senador Sherwin Gatchalian ti maysa a gakat a mangipawil kadagiti ubbing nga agtawen ti 16 agpababa nga agusar ti social media ditoy Pilipinas.
Iti babaen ti Senate Bill No. 2066 wenno Social Media Safety for Children Act, maipawil ti panagparehistro, panag-access wenno panagpatalinaed ti account dagiti menor de edad iti aniaman a social media platform.
Gagem ti gakat a protektaran dagiti ubbing manipud iti posible a risgo iti digital world pakairamanan ti mental, moral ken social effect ti nalabes a panagusar ti social media.
Inbatad ni Gatchalian, napateg a maaddaan ti ad-adda a komprehensibo a pagannurotan gapu ta dagiti agdama a linteg ket nakasentro laeng iti pannusa ken saan nga aktibo a panangprotehir iti online exposure dagiti menor de edad.
Iti babaen ti gakat, obligado a mangipatungpal ti naiget nga age verification systems kadagiti social media companies kas ti ID authentication, facial recognition wenno dadduma pay a kapada a teknolohia.
Masapul a mangiwayatda ti regular audit tapno maammoan ken ma-deactivate dagiti account dagiti menor de edad.
Ti Department of Information and Communications Technology (DICT) ti mangtutok iti panangipatungpal ti panagbantay kadagiti social media platforms ken age verification providers.
Kabayatanna, no agbalin a linteg, mabalin a mamulta ti manipud P1 million agingga P10 million dagiti social media companies iti kada panaglabsing ken nayon a P100 iti kada aldaw kabayatan nga agtultuloy ti panaglabsing.
