LAOAG CITY – Naiyuswat ti blessing ken ribbon cutting kadagiti solar streetlights a baro a nainstolar iti bypass road ditoy siudad ti Laoag agingga iti masakopan ti ili ti Bacarra.
Daytoy ket indauloan a mismo ni 1st District Congressman Sandro Marcos kadua na dagiti opisyal ditoy siudad ti Laoag kas kada konsehal Bryan Alcid, Jaybee Baquiran, Handy Lao ken Kiko Ang.
Segun ken ni Marcos, ti pannakainstolar kadagiti streetlights ti kaunaan a proyekto na sipud nagtugaw kas diputado iti umuna a distrito ditoy probinsya.
Inbatad na a napanunotan na ti nasao a proyekto gapu ta iti bypass road ti kangrunaan a pakapaspasamakan kadagiti nagduduma nga aksidente.
Gapu iti daytoy, mangnamnama ni Marcos a babaen iti nasao a proyekto ket bumaba ti kaso dagiti desgrasya iti lugar.
Plano met ti diputado a manayunan ti solar street lights agingga iti nagbedngan ti siudad ti Laoag ken iti ili ti Paoay ken daytoy ket manaynayunan iti tinawen.
Kabayatanna, basar iti Department of Public Works and Highways 1st engineering district engr. Glen Miguel, ti proyekto ket agdagup ti 300 a milyon a pisos.
