LAOAG CITY – Balligi ti pannakatiliw ti maysa a kameng ti Philippine Army gapo iti panaglabsing na iti Article 248 iti Revised Penal Code wenno murder iti ili ti Bangui.
Binigbig ni Police Lt. Christopher Pola, ti chief of police ti PNP-Bangui ti natiliw a soldado a ni Sgt. Norman Marquez Campañano a nakabase iti Head Quarters and Head Quarters Support Company 2nd Infantry Division, Philippine Army iti Gen. Mateo Capinpin, Tanay, Rizal.
Ti warrant of arrest ket inparuk-at ni Hon. Felix Salvador, dati a Presiding Judge ti RTC Branch 19 iti ili ti Bangui a napetsaan ti Setyembre 27, 2021.
Segun kenni Pola, nagturong da kadua da ti RMFB1, Intelligence Unit ti INPPO, CIDG ken Highway Patrol Team iti Camp Capinpin idiay Tanay, Rizal tapno iserbi ti warrant of arrest kontra kenni Campañano.
Kunana a kalpasan a nailawlawag kadagiti opisyal ti Camp Capinpin ti kaso ni Campañano ket sitatallugod da met nga in-turn over ti nadakamat a soldado.
Namunganay ti kaso ni Campañano iti panangpaltog na a nakatayan ti kayong na a ni Ediemar Autriz, agtawen ti 39 ken residente iti Barangay Baruyen iti ili ti Bangui.
Inbatad na a ni Campañano ken ni Autriz ket naaaddaan ti nabara a saan a panagkinnawatan sakbay a pinaltogan ti soldado ti biktima.
Maipalagip a ti rumrumuar a rason ti panagriri da Campañano ken Autriz ket gapo ta maipagarop nga agim-imon ti suspek iti biktima.
Innayon ni Pola a nangisubmitir ti counter affidavit ni Campañano ngem naduktalan ti korte nga adda ti probable cause iti kaso na a murder.
