LAOAG CITY – Saanen a nalpas ni Stephen Curry ti nagbalin a matchup iti nagbaetan ti Golden State Warriors ken Toronto Raptors kalpasan a bimmagsak iti hardcourt iti katengngaan ti 3rd quarter.
Napasamak daytoy kabayatan a pilpiliten ni Curry a sumrek iti uneg ti paint ken agaramid ti maysa a perimiter pass ngem kabayatan nga adda iti proseso ket nadungpar isuna ti Raptors rookie a ni Jonathan Mogbo.
Awan met ti naawagan a foul ken tuloy latta ti nagbalin a transition ngem iti kamaudiananna ket naipasardeng a temporario ti laban tapno ikabil ni Curry iti locker room.
Saan a nagsubli ni Curry iti hardcourt idinto a naan-anay a naipadalan iti MRI ti pelvic/tailbone area-na.
Iti agdama ket awan pay ti naiparuar a resulta ti MRI daytoy.
Kabayatanna, uray limitado ti oras laeng para iti sharpshooter iti matchup, kimmamada latta isuna ti 17 points.
