LAOAG CITY – Nabagkong ti maysa nga STL Agent iti Sitio Baligi, Brgy. Magnuang iti siudad ti Batac.
Nabigbig ti biktima a ni Rufino De Dios III y Magno, agtawen ti 62, naasawaan idinto a nabigbig met ti suspek a ni Nestor Dumaoal y Agulay, agtawen ti 61, balo, mannalon ken maipagarup a napagawid manipod iti Hawaii idiay Estados Unidos gapu iti sakit ti panagpanpanunot.
Basar iti insayangkat nga imbestigasion ti Philippine National Police iti nasao a siudad, sakbay ti napasamak nga insidente ket nagprobokar ti suspek iti pagtaengan ti agnagan ti Marina Portugal no sadino nga an-anawaen ni Jonna Madridana y Ricamara, agtawen ti 30, addaan ti live-in partner, STL Collector ken residente ti Brgy. Magnuang iti siudad ti Batac kagiddan ti panangibagana nga agawiden ti suspek.
Segun kadagiti otoridad, kalpasan ti sumagmamano a minuto ket simmangpet iti lugar ti biktima idinto ti suspek ket nagawiden no sadino nangrugin a naginom ti nasanger ti biktima.
Mainaig iti daytoy, nagsubli ti suspek iti nakapasamakan ti insidente gapu ta birbirukenna ti cellphone daytoy ken pabpabasolenna ti biktima ken ni Ms. Madridana ngem naglikudanda ti pammabasol kadakuada ti suspek.
Naammoan a nagtugaw ti suspek iti abay ti biktima ken nagkadua dagitoy a naginom ti arak.
Nupay kasta, nagtultuloy a nagbirbirok ti suspek agingga nga adda ti inruar ti suspek a kitchen knife wenno kutsilyo nga agatiddog ti nasurok 12 a pulgada manipod iti likudna ket ditoy a kellaat a binagkongna ti biktima iti akinkannigid a kimmotna.
Kabayatanna, ti biktima ket dagus a naitaray iti Mariano Marcos Memorial Hospital and Medical Center iti siudad ti Batac babaen ti City Health Office idinto ti suspek ket naikabil iti kuerpo ti pulisia para iti naan-anay nga imbestigasion.
