LAOAG CITY – Balligi a naiyuswat ti Stray Animal Control Officer Training and Deputization ditoy siudad ti Laoag.
Daytoy ket babaen iti inpasa iti konseho a City Ordinance No. 13-2026-054 – Veterinary Code of 2026.
Segun ken ni City Councilor Justine Chua, Committee Chair on Agriculture, Cooperative, and Livelihood a ti ordinansa nga Authority to Seize and Impound ti Office of the City Veterinarian nga indauloan ni Dr. Samantha Licudine ket naipaiman iti otoridad a mang-deputize kadagiti Barangay Police tapno tumulongda iti panangala ken panang-impound kadagiti stray animals wenno walang nga ayup a mabirokda iti uneg ti barangayda.
Babaen iti daytoy, maisuro ti Office of the City Veterinarian kadagiti Barangay Police ti umiso, natalged, ken naasi a wagas ti panangmanehar, panangala, ken panangaywan kadagiti ayup a na-impound.
Maipaayanda pay ti umiso nga anti-rabies protection no man makagat ti ayup.
Inbatad pay ni Chua a daytoy nga inisiatibo ket mangpapigsa iti papel dagiti barangay mainaig iti responsable a panangkontrol kadagiti ayup ken kinatalged ti publiko.
