LAOAG CITY – Nalayosen ti sumagmamano a barangay iti ili ti Bacarra ken addada payen nagbakwit a residente gapu ti agtultuloy a tudo nga ituntunda ti Bagyo Carina.
Mannarimaan met ti monitoring ti Municipal Disaster Risk Reduction and Management Office (MDRRMO) iti nasao nga ili, nangruna iti panagngato ti danum iti Bislak River.
Iti agdama ket naka-low alert pay laeng ti karayan ngem naiget da a banbantayan daytoy nangruna no adda dagiti agturong pay laeng a mapan agkalap.
Kabayatanna, naka-monitor met ita dagiti kameng ti City Disaster Risk Reduction and Management Office (CDRRMO) ditoy ciudad ti Laoag nga idadauluan ni Dr. Melvin Manuel.
Kunana a nakibinnuligda metten kadagiti amin a Barangay Officials a pagtalinaedan ti linya ti komunikasyon inkaso no adda emerhensia iti lugarda.
