LAOAG CITY – Kinumpirmaran ni Barangay Kagawad Jessie Lagundino iti Barangay Pancian iti ili ti Pagudpud nga adda napasamak a landslide iti barangay da.
Segun kenni Lagundino, adda pay dagiti pagtaengan a sinerrek ti danom gapo iti agtultuloy a panagtudtudo.
Inbatad na a ti kalsada a nakapasamakan ti panagregaay ti daga ket agpapan maisursurat ti damag ket saan a madalyasatan dagiti motorista gapo ta agtultuloy pay laeng ti tudo.
Kunana a gapo iti daytoy ket sabalin dagiti tinurong ti ayos ti danom kadagiti karayan ke waig iti barangay da.
Agpapan maisursurat ti damag ket awan pay dagiti inbakwit da a residente a naapektaran iti nasao a panaglayos.
Malaksid iti barangay da, adda pay dagiti sabali a barangay iti nasao nga ili ti nalayos kas iti Caunayan, Pasaleng ken Balaoi.
