LAOAG CITY – Inlawlawag ni PLt. Col. Rafael Lero, ti hepe ti PNP-Laoag ti rason nu apay nga adda dagiti kameng ti PNP a positibo iti covid-19 a naka-isolate iti mismo nga stasyon.
Segun ken ni Lero, inpalubos iti biang ti City Health Office ti panag-isolate dagiti positibo iti nasao a pasdek.
Inbatad na a daytoy ket gapu ta iti maikadua a kadsaaran ti pagtaltalinaedan dagitoy ken awan ti sabalia makapulapol da.
Kuna na a dagiti negatibo a pulis ti adda iti umuna a kadsaaran ti stasyon ken dagitoy ti mangtratar kadagiti agkamang a tattao.
Inbunannag na nga awan ti pagamakan gapu ta naiget a masursurot ti protocols ken saan a makipulpulapol dagiti nagpositibo.
Maipalagip a dimmalan iti RT-Test dagiti amin kameng ti PNP kalpasan a nakapulapod da ti maysa a pulis nga immunan a nagpositibo iti virus.
Kabayatanna, nu pay saanen nga inbuksilan ni Lero ti bilang dagiti nagpositibo ket inbatad na nga ad-ado ti negatibo ngem dagiti nagpositibo a pulis.
