LAOAG CITY – Inbatad ni Mr. Jeomer Salvador, Presidente ti Bawang and Natnateng Association iti ili ti San Nicolas, a saan dan nga agmula para iti 2nd crop, kangrunaan na ti bawang ken mais gapo ti kinangina ti krudo.
Inlawlawag na a kaadoan kadakuada a mannalon iti nasao nga ili ket water pump ti us-usaren da nga agpadanom isut gapuna a kasapulan da ti ado a krudo.
Kunana pay a saan dan a kabaelan ti agsuplay ken agibiahe kadagiti maapit da a produkto gapu ta no kuntaren da ti mapastrek da ket dakdakkel ti pukaw da aglalo ket agtriple ti nagastos da ti krudo.
Innayon na a ti pay problema da ket ti nalaka unay a panaggatang dagiti middlemen kadagiti produkto da, ngem kapilitan latta nga ilako da dagiti apitda gapu ta awan ti sabali a pamastrekan da.
Kabayatanna, inpakaammo ni Salvador a gutgutiguten ida ni Mayor Vincent Bonuan nga agmula ti tabako ta dakkel ti bingay dagiti agmula babaen ti RA 7171.
Malaksid iti daytoy, adda pay iyus-uswat ti Mayor a programa a Solar Power Irrigation a kas tulong kadagiti mannalon nangruna ita da dakkel ti nagngatoan ti presyo ti krudo.
