LAOAG CITY – Maamendaran ti sumagmamano a probisyon ti Anti-Rabies Ordinance ditoy siudad ti Laoag.
Daytoy inbatad ni Sangguniang Panlungsod RJ Fariñas, ti chairman ti committee on health.
Segun ken ni Fariñas, maysa ditoy ti pannakagudwa ti masingir a 50 a pisos iti tunggal aso a makolkolektar iti kada tawen nu sadino a ti 50% daytoy ket sumrek iti barangay idinto a ti nabatbati a 50% ket iti lokal a gobierno.
Malaksid iti daytoy ket karaman pay a naamyendaran ti kaadda ti pound iti kada barangay pakairamanan ti pannakaipatungpal ti impounding fee iti tunggal animal ken aggatad iti 300 a pisos.
Mainaig iti daytoy, nu saan a maala a dagus ti animal nga adda iti pound kalpasan ti tallo nga aldaw ket manayunan ti 10 a pisos ti impounding fee iti inaldaw.
Ti pannakaamyendar ti nasao nga ordinansa ditoy siudad ket tapno ad-adda a maigetan ti pannakaiyimplimentar daytoy ken gapu ta arig a saanen a mapanpansin.
Immunan nga inpakaammo ni Fariñas a dagiti masingir a fees ket isu met laeng ti mausar iti panangpadur-as dagiti maestblisar a pounds para kadagiti animal.
