LAOAG CITY – Nangipila ti bukud a bersion ti gakat nga Anti-Political Dynasty Bill da Senators Ping Lacson, Robinhood Padilla, ken Kiko Pangilinan.
Gagem ti nasao a gakat nga ipawil ti aggigiddan a panagserbi iti gobierno dagiti agkakabagian ditoy pagilian.
Iti nagsisina a gakat, maipawil ti aggigiddan nga agkandidato para iti lokal a posision iti maysa nga ili, siudad wenno probinsia, ti agasawa ken dagiti annakda agingga iti second degree, daytoy man ket lehitimo ken saan a lehitimo, full wenno half blood.
Dinakamat ni Padilla iti nakalap nga impormasion a 87% dagiti governor ket adda ti kabagianna iti gobyierno, 72% kadagiti vice governor ket produkto ti political dynasty ken 53% dagiti nakatugaw a Mayor ket manipud met iti dynasty. Adda ti panagadal idi 2013 a nangatngato ti krimen, poor governance ken naginad a panagdur-as ti employment, infrastructures ken health care kadagiti lugar nga addaan ti political dynasties iti baet a dakkel ti nailatang para iti congressional funds.
