LAOAG CITY – Nagsisinnungbat dagiti sumagmamano nga empleado ti Laoag City General Hospital (LCGH) bayat ti naiyuswat a meeting nga indaulwan ni Mayor Michael Marcos Keon.
Namunganay daytoy ti surat dagiti empleado ti LCGH ken naiturong kenni Mayor Keon.
Bayat ti taripnong, sinaludsod ti mayor no anya ti mapaspasamak wenno sitwasyon iti nadakamat nga ospital.
Ditoy metten nga inpeksa dagiti empleado ti karirikna da kenni Mr. Ferdinand Tungpalan, ti Administrative Officer seknan iti maipagarop a madi nga ugali daytoy kas iti maipagarop a panangpabpabain kadagiti empleado ken problema iti Special Risk Allowance ken Hazard Pay.
Babalawen pay dagitoy ni Tungpalan no apay nga 46 laeng nga empleado laeng ti naikkan ti Hazard Pay ken SRA iti bulan ti Setyembre agingga iti Disyembre iti naminsan a tawen.
Inlawlawag met ni Tungpalan nga 46 laeng ti inaprubaran ti Dept. of Health (DOH) gapo ta dagitoy laeng ti adda ti contact na kadagiti nagpositibo iti covid-19.
Kabayatanna, kuna ni Mayor Keon a saan kuman a naipadanon daytoy a banag iti Sang. Panlungsod gapo ta mabalin a maaramat a pamerperdi kenkuana.
Inpetteng na nga awan met ketdi ti pakainaigan na iti SRA ken Hazard Pay a kas iti rakurak dagiti empleado ngem ti concern da ket saan da a kayat nga agsubli ni Tungpalan iti LCGH.
Naamoan a ti saan a kinayat ti mayor ket ti saan a panagatendar dagiti dua a doktor no sadinno nga idi nagpaayab ti mayor para iti taripnong ket adda ti rumrumuar a mensahe a saan da a baunen dagiti empleado.
Nupay kasta, nailawlawag met a ti ammo ti doktor ket ni Tungpalan ti nagpaayab ke naladawen idi naamoan da a ni Mayor Keon ti agpa-meeting.
Malaksid iti daytoy, naamoan nga adda pay ti pinirmaan ni Dr. De Silva a memorandum seknan iti dua a milyon a pisos nga SRA dagiti empleado.
Kalpasan daytoy, naibabawi ti dua a milyon a pisos gapo ta immapela ni Dr. De Silva ken Dr. Ramos a maikkan met dagiti saan pay a naipaayan iti daytoy.
