LAOAG CITY – Ibilang ni Ms. Princess De Vera, Music, Arts Physical Education and Health Teacher ti Dingras National High School a magun-od ti balligi no makita dagiti estudiante a nakasursuro gapu kenkuana.
Segun kenkuana, kanayon a saan a nalaka ti damo isu a kasapulan ti naan-anay nga anos tapno masursuro dagiti kalikagum a talento.
Inbatadna nga adu dagiti saan a makaammo iti arts wenno ti panangaramid kadagiti drawing wenno painting.
Nupay kasta, inlawlawagna nga adu dagiti estudiantena ti awan pulos ti ammona maipanggep iti arts ngem gapu iti gagarda a makasursuro ket in-inot dagitoy a nakasursuro iti panag-drawing ken panag-painting.
Inlawlawagna nga amin a makita iti aglawlaw iti lubong ket maikonsiderar nga artworks.
Mainaig iti daytoy, inpakaammona a babaen met iti talentona ket nausarna daytoy tapno adda ti pangalaanna ti panggastos kadagiti kasapulanna iti panagadalna iti kolehio.
Innayonna a saan a mapukawan ti namnama iti baet ti kinaadu dagiti sumangsangbay a problema wenno pannubok iti biag agingga a magaw-at dagiti arapaap.
