LAOAG CITY – Indaulwan ni Mr. Gary Ronquillo, presidente ti Motorcycle Philippines Federation ditoy probinsya ti panagipaay ti tulong kadagiti innem a homeless ditoy ciudad ti Laoag.
Ti nasao nga addang ket tapno maikkan ti grasya ken maragsakan dagiti homeless babaen ti panagited da ti arwaten ken makan.
Inbatad ni Ronquillo nga inaramid da daytoy gapo ta makakitkita da ti agwalang-walang a tattao kangrunaan iti sentro ti ciudad ti Laoag.
Kunana a basar kadagiti palawag dagiti maseknan ket awanan da ti pamilya isut gapo na nga adda da iti ig-igid.
Inpasingked ni Ronquillo nga itultuloy da ti panangipaay ti tulong kadagitoy.
Namnamaen na a babaen ti social media ken DSWD ket maamoan da no adda pay laeng ti pamilya dagiti homeless.
