LAOAG CITY – Sumagmamano nga indibidual ti nakumpirmaran a natay iti napasamak a pammaltog iti secondary school iti ciudad ti Graz idiay Austria.
Basar iti report, karaman kadagiti mapapati a pimmusay ket dagiti estudyante ken mangisursuro.
Inbatad dagiti otoridad a karaman pay kadagiti natay ket ti mismo a gunman a possible a pinatay na metlaeng ti bukodna a bagi kalpasan ti insidente.
Malaksid kadagiti natay ket naruay pay a sabsabali dagiti nasugatan iti napasamak a pammaltog.
Naduktalan pay a ti suspek ket maysa metlaeng nga estudyante iti nadakamat a pagadalan.
Iti agdama, agtultuloy ti naiget nga imbestigasyon dagiti otoridad mainaig iti nasao a pasamak.
