LAOAG CITY – Interesado dagiti sumagmamano nga investors nga immay bimmisita ditoy Ilocos Norte iti kallabes a sumrek iti negosio nga adda pakainaigan ti renewable energy, agrikultura ken ti mangipasdek ti resort.
Segun ken ni Bise Gob. Cecilia Araneta Marcos nga ti panagturongda idiay Cebu itay kallabes para iti pannakaitandudu ti direct flight a Laoag-Cebu ken Cebu-Laoag ti Philippine Airlines ket ginundawayanna ti nangawis kadagiti investors nga umay ditoy probinsia.
Inbatadna nga inpannakkelna kadagitoy nga adu kadagiti oportunidad a mabalin nga idiaya ti probinsia.
Naragsakan daytoy manipod nga adu kadagiti turista ti naggapu iti Cebu, Mindanao ken Manila a naallukoyna nga umay bumisita.
Segun kenkuana, dua kadagitoy ti agtultuloy ti pannakataripnongda kenkuana nangnangruna kadagiti interesado a mangipasdek ti renewable energy ken resort ditoy probinsia.
Kuna ti bise gobernador nga iti kanito naga agtultuloy ti plano dagiti nadakamat nga investor ket ad-adu dagiti trabaho a maidiaya kadagiti umili.
Malaksid iti daytoy, inpakaammona nga addaan pay ti maysa a grupo kadagiti investor no sadinno nga interesado iti agrikultura idinto a kangrunaanna ti industria ti dragon fruit bayat a ti sabali a grupo ket naggapu iti Zamboanga idinto a kalikagumda ti sumrek iti fishing industry.
Innayonna nga adda ti dua nga investor a nangiparipirip nga interesado a mangbiag iti Northern Foods Corporation.
Iti agdama, inlawlawagna a masapol a masolbar nga umuna dagiti parikot a sangsangoen ti nasao a korporasion sakbay a maituloy ti negosasion.
