LAOAG CITY – Saan nga umannugot ti sumagmamano nga umili ditoy probinsia iti pannakaitantan ti Barangay and Sangguniang Kabataan Elections 2026.
Segun ken ni Mr. Jiezrel Verdadero, Public Utility Vehicle driver, naruay kadagiti agdama a nakatugaw a barangay officials ti saan nga alisto a pagtarayan, awan ti kabaelanna a mangidaulo ken saan a rumbeng nga agserbi iti publiko.
Inbatadna a masapul a maamendaran ti educational attainment dagiti amin nga agpaidasig iti local man wenno national position tapno ad-adda nga ammoda ti mangputar ti maysa a resolusion wenno ordinansa.
Inlawlawagna a panawenen a masukatan dagiti opisial ti barangay a makita nga awan met dagiti naaramidanna kabayatan ti panagakemna iti puesto.
Innayonna a kumanunong met daytoy iti pannakaiyalud-od ti termino dagiti maelektaran nga opisial ti barangay.
