LAOAG CITY – Dimmalan ti sumagmamano nga asosasion iti uppat a barangay ditoy siudad ti Laoag iti panagsanay ti Sewing Fashion Design.
Karaman kadagiti barangay a nakipaset iti nasao a programa ket ti Barangay Zamboanga, Mangato, Cavit ken Caaoacan.
Mainaig iti daytoy, saan laeng a basta panagdait ti inaramid dagitoy no diket naisuro pay kadakuada dagiti istratehia ken baro a fashion usar ti inabel kadagiti aramidenda.
Naipatungpal daytoy babaen ti panagkinnammayet ti Laoag City Government babaen ti City Social Welfare and Development ken tulong ti Mariano Marcos State University ken pakairamanan dagiti mabigbigbig a fashion designer nga isuda Barry Andres ken Bong Paulino.
Naammoan a saan laengen a ti local market ti target no diket karaman payen ti national ken international market.
Ipaay ti gobierno siudad babaen iti administrasion ni Mayor James Bryan Alcid ti suporta daytoy a pagsapulan dagiti umili kangrunaanna ditoyen iti pannakailako dagiti partuatda.
