LAOAG CITY – Kinumpirmaran ni Police Major Joseph Tayaban ti Chief of Police ti Philippine National Police iti ili ti Badoc a naipilan babaen iti regular filing ti kaso kontra kadagiti suspek iti napasamak a pammaltog iti Brgy. Pagsanahan Sur iti nasao nga ili.
Nabigbig dagitoy a da Gerald Dagdagan y Dagupion ken Edwardson Dagupion, agpada nga addaan ti umno a tawen ken agpada dagitoy a residente ti Brgy. Morong iti ili ti Badoc.
Segun kenkuana, naiyakar metten iti Recovery Room manipod iti Intensive Care Unit ti Mariano Marcos Memorial Hospital and Medical Center iti Siudad ti Batac ti biktima ti pammaltog a ni Allen Cajudoy y Perez, agtawen ti 23, awanan asawa ken residente ti Brgy. Pagsanahan Sur iti nasao nga ili.
Gapu iti daytoy, kunana manamnama a mangala da a dagus ti testimonya ti biktima tapno al-alisto iti panagdur-as iti isaysayangkat da nga imbestigasion.
Malaksid iti daytoy, inbatad na a mannarimaan pay ti panagrebyu da kadagiti ala ti Close Circuit Television wenno CCTV camera a nakaimuntar iti asideg iti nakapasamakan ti pammaltog.
Inlawlawag na a basar iti imbestigasion da ket awanen iti ili da dagiti suspek ken patien na nga aglemlemmeng dagitoy iti kabangibang nga ili isut gapo na nga inpakaammo da metten kadagiti dadduma pay a kuerpo ti pulisia ditoy probinsia pakaseknan iti daytoy a banag.
Inpalgak na a napanda metten kadagiti lugar a mabalin a napanan ken paglemlemmengan dagiti suspek ngem saanda dagitoy a nakita.
Innayonna nga agtultuloy ti panangbirokda kadagiti suspek tapno magun-od ti biktima ti hustisya.
Maipalagip a napaltopaltogan ti namindua a daras ti biktima babaen iti riding in tandem.
