LAOAG CITY – Natiliw dagiti tallo a senior citizens kalpasan ti naiyuswat nga illegal gambling operation iti Brgy. Mabanbanag iti ili ti Vintar.
Nabigbig dagiti senior citizens nga agtawen ti 62, 67 ken 66, agpapada a mannalon ken agkakarruba iti nasao a barangay.
Segun ken ni PCapt. Roy Manuel Ordonio, hepe iti PNP-Vintar, adda ti naawat da a report mainaig iti panagsusugal iti nasao a barangay rason a dagus a naiyuswat ti operasyon.
Kuna na a dita a naduktalan ti panagay-ayam ti tong-its dagiti maseknan.
Nakumpiskar ti pusta a 1,570 a pisos, innem a monoblock chair ken maysa a set ti baraha.
Nagtalinaed iti kustodyar ti PNP-Vintar dagiti tallo a senior citizen ken sumango dagitoy iti kaso a panaglabsing ti PD 1602 wenno illegal gambling law.
