LAOAG CITY – Kinumpirmaran ni Mr. John Rey Loyola, mangidadaulo ti MDRRMO idiay ili ti Solsona ti pannakaregreg iti derraas dagiti tallo a nakalugan ti kurong-kurong iti paset ti Solsona-Apayao Road.
Inbatad ni Loyola a dagiti biktima ket maysa a taga-Makati City ken dua a taga Barangay Mariquet iti nasao nga ili.
Segun kenni Loyola, basar iti imbestigasyon ket kabayatan nga agsalug dagiti biktima iti view deck ket napukawan ti preno ti kurong-kurong a nangitunda ti panagderetso da iti derraas.
Inlawlawag na a nagasat dagiti biktima gapo ta adda ti first responders iti ngato ken dagus da a naitaray iti ospital ken naideklara nga out-patient.
Gapo iti daytoy, nagsagaba dagiti biktima ti sugat iti nagduduma a paset ti bagi da.
Naamoan a ti paset ti nakaregregan dagiti biktima ket awan ti barikada na.
Kuna pay ni Loyola a saan a nakarehistro dagiti nasao a biktima iti Tourism Assistance Center.
