LAOAG CITY – Naarestar dagiti tallo nga indibidual iti ili ti Bacarra gapu iti panaglabsing da iti Presidential Decree No. 1602 wenno Philippine Gambling Laws babaen ti inwayat nga operasyon dagiti kameng ti pulisya iti nasao nga ili.
Nabigbig dagiti duwa nga agtawen ti 24, agpadpada nga awanan asawa, ken residente iti Brgy. 4 Poblacion iti ili ti Pasuquin, bayat a ti maysa ket agtawen ti 28, awanan asawa, ken residente iti Brgy. 33 Cabulalaan iti ili ti Bacarra.
Apaman ti operasyon ket natakuatan dagiti suspek nga aga-ayam ti billiards.
Nakumpiskar manipud kadakuada ti bet money a Php 9,350.00 iti nagduduma a dominitions, uppat a pedaso ti cue sticks, maysa a billiard bridge, 16 a pedaso ti billiard balls, maysa a billiard triangle rack, tallo a pedaso ti cue stick pouches, ken maysa a billiard table.
Iti agdama, dagiti suspek ket addan iti kustodiar ti Bacarra Municipal Police Station ken maiyur-uray ti proper disposition.
