LAOAG CITY – Inpakaammo ni Mr. Henry Pedronan, ti Municipal Disaster Risk Reduction and Management Officer iti ili ti Pagudpud a temporaryo a nasuspenso ti panagawat da kadagiti returning residents.
Segun kenni Pedronan, nasuspenso ti panagawat da agingga intono Oktubre gapo ta awan ti bakante a pakaipanan dagitoy iti Municipal Isolation Unit.
Malaksid iti daytoy,inbatad na nga awan pay ti bakante kadagiti lima a barangay isolation unit iti nadakamat nga ili.
Nupay kasta, kunana a mabalin da latta nga akumudaren dagiti agawid a kailyan da no laketdi nakasagana dagitoy n ga agbayad iti pagtalinaedan da nga hotel.
Iti agdama ket adda ti 27 a naka-quarantine iti Municipal Isolation Unit ken adda ti nakaserba a 16 a manamnama nga agawid intono Oktubre 8.
Kabayatanna, kuna ni Pedronan a 50 dagiti naipadalan iti Antigen test idi Martes, Setyembre 22 ken negatibo ti resulta dagitoy.
