LAOAG CITY – Inrakurak ti Department of Labor and Employment (DOLE) a posible a maiparuk-at inton Hulio ti desision kadagiti petision nga agkidkiddaw ti ₱1,200 nga inaldaw a minimum a sueldo para kadagiti mangmangged iti Metro Manila.
Inbatad ni Department of Labor and Employment spokesperson ken Assistant Secretary Lennard Serrano, umaboten iti 16 dagiti petision a naawat ti Regional Tripartite Wages and Productivity Board (RTWPB) iti National Capital Region (NCR) para iti sueldo.
Kaudian kadagiti petision ket manipud iti Business Process Outsourcing Industry Employees Network (BIEN) Philippines kagiddan ti panagngato ti presio kadagiti magatgatang ken serbisio gapu iti tension iti Middle East.
Basar iti Department of Labor and Employment, adda ti bileg ti Regional Tripartite Wages and Productivity Board a mangrebisar kadagiti petision ken mangiparuk-at ti wage order wenno desision iti minimum wage adjustments.
