LAOAG CITY – Manamnama a ngumato ti presio ti bagas inton Setiembre.
Iti panagdengngeg ti PROTECT Committee, sinaludsod ni Senador Bam Aquino no ania dagiti agricultural products ti posible a panagngato ti presio inton Hulio wenno Agosto gapu iti epekto ti panagngato iti presio ti petrolyo.
Inbatad ni Agriculture Secretary Francisco Tiu Laurel Jr., posible a ngumato ti presio ti bagas iti P60 agingga P62 iti kada kilo inton sumaruno nga harvest season inton Setiembre gapu iti panagngato ti presio ti fertilizer manipud iti P1,650 nga ita ket umabot iti P3,000.
Kunana a sigurado a ngumato ti presio iti bagas no saan nga agusar dagiti mannalon ti alternative fertilizer nga isingsingasing ti Department of Agriculture.
Ad-adalen ti ahensia a mapagtalinaed ti nababa a presio ti bagas iti babaen ti “rice blend” ken “corn blends”
Inlawlawag ni Laurel, ti rice blend ket panagtitipon ti imported a bagas iti local rice wenno 70-30/60-40 tapno agpada a masuportaran ti lokal a bagas dagiti mannalon ken imported rice idinto ti corn blend ket 50-50 a white corn ken bagas.
