LAOAG CITY – Inpasigurado ti Department of Agriculture (DA) nga agtultuloy ti programa ti gobierno iti panaglako ti P20 iti kada kilo ti bagas agingga a malpas ti termino ni Presidente Ferdinand Marcos Jr. inton 2028.
Basar iti Department of Agriculture, ikagkagumaan ti ahensia nga itultuloy ti programa para kadagiti kualipikado a benepisiario.
Iti State of the Nation Address, inbatad ti Presidente a sumurok 12 a milyon a Pilipino ti nabenepisiaran iti programa a “Benteng Bigas, Meron Na,” a nailatang para kadagiti vulnerable sectors.
Ti nalakas a bagas ket aggapu iti stock ti National Food Authority (NFA) a gumatgatang ti irik manipud mismo kadagiti lokal a mannalon.
Supsuportaran ti gobierno ti programa iti babaen ti Food Terminal Inc. (FTI).
Basar iti Department of Agriculture, adda ti sumurok 500,000 metric tons nga stock ti bagas ti National Food Authority nga umdas tapno masolbar ti kasapulan ti programa.
Manipud iti agdama a 807 a Kadiwa sites iti intero a pagilian, target ti Department of Agriculture a manayonan daytoy iti nagbaetan ti 1,500 agingga 2,000 sites kadagiti sumarsaruno a bulan.
Kabayatanna, kuna met ti Department of Agriculture nga in-inoten a bumabbaba ti presio ti bagas iti merkado publiko.
