LAOAG CITY – Nakaawat manen ti kablaaw ni Pinay tennis sensation a ni Alex Eala uray awan pay ti nakipasetanna a laban.
Daytoy ket kalpasan nga agtultuloy a ngumatngato ti Filipina tennis star iti Women’s Tennis Association (WTA) rankings.
Basar iti kaudian a datos nga inruar ti WTA iti official site-da, immuli ni Eala iti rank No. 72, ti kangatoan a ranggo iti pakasaritaan ti professional career-na.
Ti agtawen ti 19 a Pinay ket immunan a mapagsasaritaan gapu iti kinasiribna iti semifinal run iti Miami Open.
Inabakna ti tallo a Grand Slam champions pakairamanan da Madison Keys ken Iga Swiatek.
Ni Eala ket agsansanay iti Rafa Nadal Academy idiay Espanya ken nakagun-oden ti lima nga ITF singles titles ken dua a doubles crowns2.
Kabayatanna, ti panagngatona ti ranggo ket pammaneknek iti kinalaingna a nangipaay kenkuana ti titulo kas kangatoan a ranggo a Filipina player iti pakasaritaan ti WTA.
