LAOAG CITY – Manamnama a marugian ita a tawen 2023 ti nabayagen a kalikagum a mapagbalin a “centralize” ken “organize” dagiti pampasahero a luglugan ditoy Ilocos Norte.
Daytoy ti inpakaammo ni Gob. Matthew Marcos Manotoc iti insayangkatna a press conference.
Segun kenkuana, dakkel a banag ti tallo gasut uppat a pulo a milyon a pisos nga inpaay ti Department of Transportation nga idadauloan ni Sec. Jaime Bautista tapno mairugin ti nasao a ganuat.
Nupay kasta, inannugot ti gobernador a kurang ti nasao a pundo rason a kiniddawna iti sekretario a nayunan ti idadauloanna a departamento ti inpaayda a pundo.
Inlawlawagna nga iti ibibisitana iti Palafox Office idiay siudad ti Manila, naipakita kenkuana ti plano pakairamanan ti “building design drawing” ti maiyestablisar a “transportation hub” ditoy probinsia a manamnama a maipasdek iti asideg ti Provincial Engineering Office.
Impalgakna a basar iti plano ket saan laeng a regular a “transpo hub” ti maiyestablisar ngem adda pay ti maipasdek a “roof top park and garden” iti ngato ken mapagbalin daytoy a “mix used development”.
Imbatadna a kaipapanan daytoy nga adda ti commercial, pangopisinaan ti gobierno ken kangrunaanna ti “transpo hub” a para kadagiti pampasahero a lugan.
