LAOAG CITY – Nagreklamo ditoy Bombo Radyo Laoag ti maysa a lalaki gapu iti maipagarop a saan a nasayaat a nagpasaran na iti PNP iti ili ti Bacarra.
Nabigbig daytoy a ni Mr. Victor Villanueva, tricycle driver ken residente iti Barangay 4 iti ili ti Bacarra.
Inlawlawag ni Villanueva nga idi sabado ket inlako na ti aso da ken iti isasangpet na iti balayda ket sapulen ti anak ken asawa na ti naglakoan na.
Inbatad na nga idi inbaga na a naiyinom na ti naglakoan na ti aso ket ditoy metten a maipagarop a nagrangasan a kinabkabil dagiti agina na rason a napanna innala ti tadi na ket pinangtaan na a papatayen na dagitoy.
Inpalgak na a kalpasan laeng ti sumagmamano a gundaway ket addan dagiti pulis ken inkabil da daytoy iti kwerpo ti pulisya.
Innayon na a kabayatan ti kaadda na iti kwerpo ti pulisya ket maipagarop a kinugtaran ti maysa a pulis ti tumeng na ken sinuyatan da ti napudot a danom iti sumagmamano a daras rason a nakarugit daytoy.
Segun pay ken ni Villanueva, pinangtaan dagiti saanen a nabigbig a kameng ti pulisya a papatayen ken danug-danugen da daytoy.
Kabayatanna, naglikudan ni Police Major Arnel Tabaog, ti chief of of police iti ili ti Bacarra, alegasyon ni Villanueva a sinuyatan da daytoy ti napudot a danom iti sumagmamano a daras.
Inpakaammo na nga idi napan da rinespondean ni Villanueva ket kinaryar na dagitoy ken idi iserrek da iti pagbaludan ket nagkedked ken agpukka-pukkaw gapu ta agbiruk ti electric fan isut gapuna a nakasuron da ngem saanda a dinangran daytoy.
Kuna ni Tabaog a nakasuron pay dagiti dinanun ni Villanueva a balud isut gapuna nga inted da lattan kenkuana ti pangringgor na nga electric fan tapno laeng agulimek ken agtalna ti nasao a tricycle driver.
