LAOAG CITY – Nakagun-od ti world record ti agtawen iti 15 a magician manipud idiay Ireland kalpasan a nakaipabuya ti adu a magic tricks iti nabiit nga oras.
Kinumpirmaran ti Guinness World Records a ni Cillian O’Connor ti baro a record holder ti titulo a “Most Magic Tricks Performed in One Minute (under 16).”
Daytoy ket kalpasan a nakapag-perform ti 28 a magic tricks iti uneg ti maysa a minuto.
Naammoan a dagiti sumagmamano a magic tricks nga inaramidna ket ti panagpukaw ti maysa a magic wand ken ti panagsukat ti maris iti dua a pedaso a lupot.
Naala ni Cillian ti awag a “real-life Harry Potter” kalpasan a limmaban isuna kas contestant ti talent show a “Britain’s Got Talent” no sadinno a nagbalin a third placer daytoy iti grand finals ti Season 16.
