LAOAG CITY – Nagballaag ni Ukrainian Prime Minister Denys Shmyhal a possible nga agresulta iti World War 3 no maabak ti Ukraine iti laban da kontra iti Russia iti baet ti nabayag a nakapenpen a panagbotos iti foreign aid bill ti Estados Unidos.
Segun ken ni Shmyhal, kasapulan da ti nasao a security assistance manipod iti Estados Unidos gapu ta no saan da a protehiran ti pagilian da ket bumagsak ken agresulta ti pannakadadael ti seguridad ti global system no sadinno a maaddaan ti ad-ado a riribok, giyera ken mabalin nga agtungpal iti maikatlo a gubat iti sangalubungan.
Saan a daytoy ti umuna a gundaway a nangiparuk-at ti kastoy a ballaag ti Ukraine mainaig iti possible a pannakaabak da iti giyera.
Maipalagip nga iti napalabas a tawen ket inrakurak ni Ukrainian President Volodomyr Zelensky a no mangabak da iti giyera da iti Russia, possible a ti sumaruno a rauten na ket ti Poland a mabalin nga agresulta ti World War 3.
Kabayatanna, positibo met ti Ukrainian Prime Minister nga ipasa ti US Congress ti $61-billion a foreign aid bill para iti Ukraine.
Naituding a pagbobotosan iti US House of Representatives ti nasao nga aid package intono sabado.
Karaman pay iti nasao a proposal ti panangipaay ti pondo para iti Israel ken iti Indo-Pacific.
