LAOAG CITY – Umabot iti 17 a tattao ti natay idinto a naruay dagiti mapagam-amkan a mapukpukaw kalpasan a narpuug ti matartarimaan a railway bridge iti North-eastern India.
Napasamak ti insidente iti asideg ti Sairang, agarop 20 a kilometro ti kaadayo na manipod iti ciudad ti Aizawal iti estado ti Mizoram.
Segun ken ni Mizoram chief minister Zoramthanga, umab-abot ti nasurok nga 40 a mangmangged ti adda iti site idi narpuug ti rangtay.
Agpapan ita ket saan pay a nalawag no ania ti nakarpuugan ti rangtay.
Mainaig iti daytoy, inkari ni Indian Prime Minister Narendra Modi nga ipaay da amin a mabalin nga itulong ti gobierno na kadagiti naapektaran ti insidente.
Naamoan a mangipaay ti gobierno ti sag-200,000 rupees wenno kaibatugan ti $2,400 iti pamilya dagiti pimmusay.
Iti agdama, manarimaan ti naiget a panagim-imbestigar ti state-run railway authority mainaig iti nasao nga insidente.
